幼稚園開學日（八）女校男生

今年學校嚟左位新老師，啱啱IVE畢業，令今年開學週更加熱鬧，因為佢係開校以來第一位男老師！

幼稚園老師一向女多男少，所以呢位男老師好似中學既女校男生一樣受歡迎。小朋友鍾意黏住大哥哥，男孩子鍾意扯佢衫尾踩佢對鞋，女孩子鍾意用崇拜既眼神望實佢；老師鍾意教小師弟，連家長都鍾意問男老師自己小朋友既情況，搞到佢拍檔（即另一位班主任）坐冷板凳。偏偏呢位男老師異常怕醜，同家長講解時會面紅，被多過一個家長圍住更加 Ai…Ai…Ai 咁疾哂，經常要拍檔救駕。

最搞笑係K3呢兩位班主任，一位係男老師，另一位係姓藍既女老師。小朋友發現左，就不斷圍住兩位班主任，笑佢地「你係藍老師？你又係男老師？有兩個藍／男老師，嘩哈哈！」咁樣編班，我懷疑校長係特登既。