幼稚園開學日（九）細仔唔瞓覺

踏入開學第三週，細仔（N1班）開始要返全日，最難過既環節就係「瞓晏覺」。為左令小朋友可以喺陌生環境下瞓覺，會暫時容許佢地攬住心愛玩具一齊瞓，但係幫助唔大。除左小部分一副天榻落黎都唔關我事既小朋友一掂張床就瞓，其餘既有D眼濕濕望住天花板細細聲叫媽咪媽咪，有D同自己玩具講「好快好快媽媽就黎接你」繼續催眠自己，仲有小部分堅持只係坐喺床邊唔肯瞓低。

最驚既一次，夠鐘叫小朋友起身時，突然有個K1女孩子大聲喊「老師，我睇唔到野，老師我睇唔到嘢，好驚呀！」嚇到我即刻抱佢落床，睇下係咪有昆蟲爬左入眼。佢繼續大聲喊仲不斷捽眼，我拉開佢對手，見唔到紅腫，睇多一陣終於明白點解佢睇唔到野。於是同佢講「請－你－掹－大－對－眼－丫」。然後，佢以慢動作掹大對眼，得左！呢位小朋友一定係發左個好奇怪既夢，奇怪到以為自己盲左。