幼稚園生活（三）燈籠 vs 國旗

學校開左今年以黎最嚴肅既會議，佈置廳日家長活動時，應該掛燈籠定掛國旗？慶祝中秋定慶祝國慶？

大家咁戰戰兢兢，都係驚慶祝國慶唱國歌睇升旗，就有家長話我地洗腦，唔慶祝就話我地唔愛國政治唔正確。為保安全，主任仲攞埋教育局2006年出既「學前教育課程指引」黎睇。原來指引第29頁「個人與群體」，有一項寫明「學習目的，使幼兒能夠認識中國文化，從而建立國民身份既認同」。咁即係燈籠同國旗都無罪，熊貓同龍舟都無罪，年獸同筷子都講得。其實學校都唔係報喜不報憂，小朋友帶番黎既新聞分享，四川地震小學倒塌會講，毒奶粉大頭ＢＢ會講，動車相撞會講，總之小朋友容易明白既都會講。

好笑既係，當個個家長都極度擔心中小學既「德育及國民教育指引」，原來幼稚園果本五年前就有寫國民教育啦。唔知家長發現左，會唔會要求撤回呢?

幼稚園生活（二）最多投訴既活動

如果要你估，幼稚園全日日程入面，邊一種活動小朋友投訴最多，你會估係咩？

聽故事（投訴俾前面小朋友阻止睇唔到圖書）？

大肌肉活動（投訴俾人踩親撞親）？

瞓晏覺（投訴隔離位搞搞陣）？

呢Ｄ通通都係小兒科，小朋友投訴最多既活動其實係…

…美術活動！投訴包括；老師，我張紙有一點黑色！老師，我張紙個角皺左！老師，我支紅筆短過佢果支！

可能每個小朋友既基因都包含藝術家氣質，力求完美係好事所以唔可以怪佢。但係呢種「完美主義者」性格確實令我地好頭痛，每節廿五分鐘既美術活動，起碼要用七八分鐘黎處理呢Ｄ投訴。點處理？有得換既當然會同佢地換，無得換就攤牌，即係攤開哂剩番既物資俾佢地睇，證明唔係我地唔換，係無得換。又或者幫佢擦走黑點，剪走皺左既角，儘量接近完美，但通常小朋友都仲係嘴扁扁。

希望呢個過程可以令小朋友明白，人生有時未必事事完美，有時要學識接受現實，或者接受少少瑕疵未必等於唔完美，又或者學轉個彎諗吓點解決問題，而唔係死瞪住瑕疵唔放。

幼稚園生活（一）驚師日

每年九月敬師日，校長都會派發空白感謝咭俾小朋友，如果佢地或者家長有嘢想多謝老師，可以寫喺咭上送俾老師。有Ｄ小朋友亦會送自己畫既畫，或者零食俾老師。

今年有小朋友送左一個小錦囊俾我同我拍檔，入面有張硬硬地既紙，我地以為係小朋友畫既畫，或者摺紙之類，所以多謝完就放左喺櫃上面。直至午飯時間，我地打開小錦囊，發現入面竟然係一張伍佰蚊紙！嘩，做老師咁耐第一次敬師日收到錢，嚇到我同拍檔即刻衝入校長室。到家長接放學時，校長即刻邀請家長入校長室歸還呢一千蚊，原來係家長深圳既同鄉同佢講，敬師日記要送大禮，小朋友先會食得飽著得暖。其他班老師知道左，話我地呢D係碎料，仲俾左網上一張小學生攞住兩個GUCCI紙袋返學既相我地睇，話喺內地做幼稚園老師，唔止有錢收，仲可以免費去國外旅行。

突然諗番起，之前喺天水圍做替工，都有一位喺深圳開餐館既家長邀請全校老師上深圳按摩食飯全包宴。校長話只要唔帶走禮物同錢就唔算犯法，不知真定假呢？

幼稚園開學日（十）大仔唔瞓覺

細仔（N1）唔瞓晏覺，通常都會留番喺自己張床，無咩殺傷力。但係大仔（K3）就唔同，佢地瞓唔著，就會靜靜起革命。

幼稚園既膠床，排列時係頭對腳、腳對頭咁排，原意係小朋友雖然床貼床，但唔會面對面，以免細菌由口鼻傳播。不過就變成我個頭望住你對腳，於是瞓唔著既小朋友，就會幫兩邊瞓著左既同學仔對腳著襪除襪著鞋除鞋（無錯，極之唔衛生！）。又會拆左同學仔床單綁住床既果條繩，再將左中右三張床單綁埋一齊，直至嬸嬸收床時尖叫先會發現。

大膽Ｄ既小朋友甚至會爬落床，佢地知道班房熄左燈，老師單靠枱上的燈仔，係好難發現床單下面既人溜走左，只要佢地貼地爬，唔高過床就得。爬落床玩咩？好抱歉，除左同學仔既鞋襪，床下底係無其他野玩既。但係小朋友有得搗亂就滿足，最鍾意調亂哂各人既鞋襪，完事後靜靜爬番上床當無事發生，等待住大家瞓醒時搵唔到自己鞋襪時既尖叫。

記得最經典既一次，係當我著燈時發現，地下排列左一條整整齊齊既「鞋隊」同一條整整齊齊既「襪隊」，三十幾隻鞋同襪由班房呢邊排到另一邊，好似兩隊螞蟻兵團，震撼到連隔離班Ｄ老師都湧哂過黎參觀，大家都歎為觀止。

P.S. 三星期分段開學週完結，下星期正式踏入常規課程

幼稚園開學日（九）細仔唔瞓覺

踏入開學第三週，細仔（N1班）開始要返全日，最難過既環節就係「瞓晏覺」。為左令小朋友可以喺陌生環境下瞓覺，會暫時容許佢地攬住心愛玩具一齊瞓，但係幫助唔大。除左小部分一副天榻落黎都唔關我事既小朋友一掂張床就瞓，其餘既有D眼濕濕望住天花板細細聲叫媽咪媽咪，有D同自己玩具講「好快好快媽媽就黎接你」繼續催眠自己，仲有小部分堅持只係坐喺床邊唔肯瞓低。

最驚既一次，夠鐘叫小朋友起身時，突然有個K1女孩子大聲喊「老師，我睇唔到野，老師我睇唔到嘢，好驚呀！」嚇到我即刻抱佢落床，睇下係咪有昆蟲爬左入眼。佢繼續大聲喊仲不斷捽眼，我拉開佢對手，見唔到紅腫，睇多一陣終於明白點解佢睇唔到野。於是同佢講「請－你－掹－大－對－眼－丫」。然後，佢以慢動作掹大對眼，得左！呢位小朋友一定係發左個好奇怪既夢，奇怪到以為自己盲左。