2015年7月20日 星期一

大大聲祈禱



在基督教或天主教幼稚園就讀的小朋友,每日都會有祈禱時間。小朋友不會無緣無故自己識祈禱,於是老師就要像領讀大圖書一樣開聲領禱。老師講一句,小朋友講一句,一班小朋友大大聲一齊祈禱。久而久之,小朋友以為但凡向天父禱告,都要大大聲。結果站在不遠處的老師,被迫聽了各種各樣的禱告:

「多謝天父賜我飲食,我希望日日有雞翼。」
「天父,我希望日日落雨無大肌肉。」(出自不想運動的胖小子)
「天父,我希望XX日日同我玩唔同YY玩。」

小朋友心中的天父,變成和許願樹、聖誕老人一樣的功能。有時,老師也會帶領小朋友代禱,希望他們學懂關心別人,例如為生病沒上學的同學代禱。小朋友大大聲代禱,變相暴露了各人的秘密:

「天父,我希望爸爸生番頭髮唔好光頭。」
「天父,我希望媽媽中六合彩唔駛返工。」
「天父,我希望哥哥唔好再瞓覺瀨尿。」

K1K2小朋友,可能真的以為只有天父才聽到他的開聲祈禱。但K3小朋友,我覺得他們大大聲祈禱的真正目的是「俾說話老師聽」:

「天父,我希望廳日唔駛返學。」
「天父,我希望老師唔好大聲鬧我。」
「天父,我希望老師唔好派咁多橙俾我。」

 小朋友開聲祈禱的習慣,和之前提及過的「大風吹」遊戲一樣,不費吹灰之力,就讓大人窺探到小朋友的內心世界。