2012年8月31日 星期五

幼稚園開學日(四)唔食得


開學前發通告問家長,小朋友有乜唔食得,意思係一食就會出事,可能係皮膚敏感、臉腫、引發哮喘或者休克(如G6PD)。花生、雞蛋、牛肉係常見食物,但係今年收番一張兩行都寫唔哂,仲要喺通告背後寫多三行既回條。蘋果,橙、奇異果、芥蘭、青瓜乜都唔食得。一問之下,原來家長將「唔食得」同「唔食」混淆左,將仔仔唔鍾意食既全部寫哂落去,所以足足有五行字!

好多家長都問老師,點解仔女屋企唔鍾意食既野,返到學校就肯食。其實唔係老師犀利,而係小朋友真係餓。九點食完早餐,又玩大肌肉活動郁手郁腳,又用腦玩遊戲做手工答問題,去到十二點已經消化哂啦,仲唔有乜食乜。加上見到同學仔食得高興,平時唔鍾意食都要食埋一份。當然仲有一個原因,係小朋友知道今餐唔食,要等到三點茶點先再有得食。就算今日堅持唔食,第二日都會學精左,唔鍾意食都要嘗試食D。幼稚園餐單日日唔同,連續五日都出現唔鍾意食既食物既機會率好低,所以唔會驚會餓餐小朋友。

小朋友喺屋企唔肯食,係因為知道有更好食既等緊佢。


2012年8月28日 星期二

幼稚園開學日(三)逃走


今年開學又見到一個奇觀,就係當老師帶住十個八個小朋友由課室行去廁所時,有幾個小朋友突然離隊衝去大門口。佢地以為一去到門口,就會有人接返屋企,但佢地無喊,剩係好冷靜咁行動。無論玩緊玩具既,食緊茶點既,做緊體操既,突然心血來潮,完全毫無先兆,話跑就跑。一個跑,第二個唔知咩事跟住跑,第三個博亂又跟埋跑,搞到老師leihei。結果當然係發現玻璃門上鎖,門外人影都無隻,唯有乖乖跟校長返課室。

放工睇報紙,發現北角一間樓上幼兒園,有個小朋友由窗逃走到離地7米既簷,仲當喺遊樂場咁跑黎跑去,仲伸個頭望落街,嚇到路人報警,貨車司機就爬上車頂想接佢。到保安打電話俾校長,先知少左個學生,好彩最終都有驚無險。不過幼兒園唔裝窗花,實在少見。


東方日報新聞轉載:
http://orientaldaily.on.cc/cnt/news/20120828/00176_008.html
 

2012年8月26日 星期日

幼稚園開學日(二)兩歲返學咁陰公!


開學日經常聽到呢句說話,而講話既人通常都七情上面,令聽果個都覺得自己真係好陰公,就算唔明「陰公」點解,都會覺得今次死梗啦,呢到一定好多壞人令我生不如死。更甚既係,通常「陰公」完仲會有下一句:「咁陰公不如婆婆/嫲嫲而家就帶你走,去麥當當食薯條好唔好?」唔係性別歧視,但通常爺爺/公公都係理性D既。

所以,開學日請家長儘量自己帶仔女返學,因為婆婆嫲嫲對住喊哂既孫仔孫女係即時投降既。喺佢地心目中,喺屋企開住冷氣睇住電視有工人照顧做少爺小姐先係最幸福既,無端端兩歲人仔俾爸媽逼返學讀書寫字俾老師鬧俾同學蝦實在太陰公。佢無諗過,朝九晚五對住冷冰冰既電視,仲要學睇工人姐姐面色仲陰公。返學起碼可以有一班小朋友陪住一齊聽故事唱歌做體操食茶點,雖然大家相處時可能會有爭拗。

下次再聽到「兩歲返學咁陰公!」,你會點答?


2012年8月25日 星期六

幼稚園開學日(一)戲劇之王


每個爸爸媽媽都認為,第一日返學既小朋友一定喊到收唔到聲。其實每年廿幾個N仔,只有一半會喊。而喺呢一半入面,再有一半係喊唔多過5分鐘,發現喊都無用就會收聲。好多媽媽以為2歲人仔傻下傻下,其實佢地精到暈。見過好多小朋友,望住阿媽時喊得聲嘶力竭,阿媽一出大門離開視線範圍,只用0.99秒既時間就收聲,再用水汪汪既眼睛望住新水泡──老師或嬸嬸。即使只有2歲,都知道眼淚對咩人有用,對咩人係嘥鬼氣。以前同家長解釋無人信,而家用手機錄低放學播俾佢睇,個個都話估唔到自己個仔女咁好戲。

手機仲有另一用途,就係對住喊得好傷心既小朋友,我地會俾佢用真手機打假電話,就算電話無聲,佢地都會跟住老師好似鸚鵡咁講「爸爸媽媽我好掛住你,我知道你地都好掛住我。我而家返學,等陣放學就過黎接我,我大個仔,唔喊架啦」呢招勁過催眠,大部分小朋友講完就會收聲。以前用玩具電話已經搞掂,呢幾年既小朋友明顯玩慣IPHONE,唔再相信玩具電話係電話。點解唔幫佢地打真電話?因為唔想爸爸媽媽再返黎,沒完沒了既分離搞到小朋友仲難適應。

小朋友面對分離傷心喊,老師係明白既。但對於「持喊行兇」既小朋友,老師係唔會屈服,尤其果D無眼淚剩係大聲叫喊既。唯一例外,係果D有哮喘唔喊得既小朋友。