2012年10月1日 星期一

幼稚園生活(四)A-Z都讀錯


呢度講緊既唔係phonics拼音既 letter sound, 而係我地以為最容易,細細個已經唱既ABC Song入面果26個字母名。

最常錯既字母,包括 E, F, H, L, R, S, V, W, X, Z
E:    如果你讀成「衣」,已經錯。正音嘴型同讀「衣」一樣,但係前頭無 yi音。
H:    如果你讀成「egg柱」,已經錯。正音係先發A既字母名「A-ch
F, L, R, S: 如果你讀既時候有兩個音節(F丫乎,L誒爐,R丫爐,S誒時),已經錯。正音只有一個音節,另一個音係好輕好輕聲。
V:    如果你讀成we, 已經錯,正音應該係要輕輕咬住下唇先發vi音。
W:    如果你讀成「得-B-U」已經錯,正音係double U.
X:    如果你讀成「egg時」,已經錯,因為中間應該有個/k/音。
Z:    如果你讀成「以錫」兩個音節已經錯,正音只有一個音節。

26個字母讀錯10個,好多小朋友入學時都係咁,因為好多家長喺屋企已經教佢地A-Z, 但係唔知自己教錯,於是老師要花好多時間去糾正佢地。其實家長錯,都係因為家長細個時既老師教錯,果個時代學校根本無拼音。如果幼稚園老師唔係接受過再培訓,都一樣會錯。所以如果家長擔心自己教錯,可以播英文碟俾小朋友聽,如果再有興趣D,可以揾網上字典,都有A-Z既正確讀音。

2012年9月27日 星期四

幼稚園生活(三)燈籠 vs 國旗


學校開左今年以黎最嚴肅既會議,佈置廳日家長活動時,應該掛燈籠定掛國旗?慶祝中秋定慶祝國慶?

大家咁戰戰兢兢,都係驚慶祝國慶唱國歌睇升旗,就有家長話我地洗腦,唔慶祝就話我地唔愛國政治唔正確。為保安全,主任仲攞埋教育局2006年出既「學前教育課程指引」黎睇。原來指引第29頁「個人與群體」,有一項寫明「學習目的,使幼兒能夠認識中國文化,從而建立國民身份既認同」。咁即係燈籠同國旗都無罪,熊貓同龍舟都無罪,年獸同筷子都講得。其實學校都唔係報喜不報憂,小朋友帶番黎既新聞分享,四川地震小學倒塌會講,毒奶粉大頭BB會講,動車相撞會講,總之小朋友容易明白既都會講。

好笑既係,當個個家長都極度擔心中小學既「德育及國民教育指引」,原來幼稚園果本五年前就有寫國民教育啦。唔知家長發現左,會唔會要求撤回呢?

2012年9月23日 星期日

幼稚園生活(二)最多投訴既活動



如果要你估,幼稚園全日日程入面,邊一種活動小朋友投訴最多,你會估係咩?
聽故事(投訴俾前面小朋友阻止睇唔到圖書)?
大肌肉活動(投訴俾人踩親撞親)?
瞓晏覺(投訴隔離位搞搞陣)?
呢D通通都係小兒科,小朋友投訴最多既活動其實係

美術活動!投訴包括;老師,我張紙有一點黑色!老師,我張紙個角皺左!老師,我支紅筆短過佢果支!
可能每個小朋友既基因都包含藝術家氣質,力求完美係好事所以唔可以怪佢。但係呢種「完美主義者」性格確實令我地好頭痛,每節廿五分鐘既美術活動,起碼要用七八分鐘黎處理呢D投訴。點處理?有得換既當然會同佢地換,無得換就攤牌,即係攤開哂剩番既物資俾佢地睇,證明唔係我地唔換,係無得換。又或者幫佢擦走黑點,剪走皺左既角,儘量接近完美,但通常小朋友都仲係嘴扁扁。
希望呢個過程可以令小朋友明白,人生有時未必事事完美,有時要學識接受現實,或者接受少少瑕疵未必等於唔完美,又或者學轉個彎諗吓點解決問題,而唔係死瞪住瑕疵唔放。