幼稚園開學日（三）逃走

今年開學又見到一個奇觀，就係當老師帶住十個八個小朋友由課室行去廁所時，有幾個小朋友突然離隊衝去大門口。佢地以為一去到門口，就會有人接返屋企，但佢地無喊，剩係好冷靜咁行動。無論玩緊玩具既，食緊茶點既，做緊體操既，突然心血來潮，完全毫無先兆，話跑就跑。一個跑，第二個唔知咩事跟住跑，第三個博亂又跟埋跑，搞到老師lei咁hei。結果當然係發現玻璃門上鎖，門外人影都無隻，唯有乖乖跟校長返課室。

放工睇報紙，發現北角一間樓上幼兒園，有個小朋友由窗逃走到離地7米既簷篷，仲當喺遊樂場咁跑黎跑去，仲伸個頭望落街，嚇到路人報警，貨車司機就爬上車頂想接佢。到保安打電話俾校長，先知少左個學生，好彩最終都有驚無險。不過幼兒園唔裝窗花，實在少見。

東方日報新聞轉載:
http://orientaldaily.on.cc/cnt/news/20120828/00176_008.html