幼稚園開學日（四）唔食得

開學前發通告問家長，小朋友有乜唔食得，意思係一食就會出事，可能係皮膚敏感、臉腫、引發哮喘或者休克（如G6PD）。花生、雞蛋、牛肉係常見食物，但係今年收番一張兩行都寫唔哂，仲要喺通告背後寫多三行既回條。蘋果，橙、奇異果、芥蘭、青瓜乜都唔食得。一問之下，原來家長將「唔食得」同「唔食」混淆左，將仔仔唔鍾意食既全部寫哂落去，所以足足有五行字！

好多家長都問老師，點解仔女屋企唔鍾意食既野，返到學校就肯食。其實唔係老師犀利，而係小朋友真係餓。九點食完早餐，又玩大肌肉活動郁手郁腳，又用腦玩遊戲做手工答問題，去到十二點已經消化哂啦，仲唔有乜食乜。加上見到同學仔食得高興，平時唔鍾意食都要食埋一份。當然仲有一個原因，係小朋友知道今餐唔食，要等到三點茶點先再有得食。就算今日堅持唔食，第二日都會學精左，唔鍾意食都要嘗試食Ｄ。幼稚園餐單日日唔同，連續五日都出現唔鍾意食既食物既機會率好低，所以唔會驚會餓餐小朋友。

小朋友喺屋企唔肯食，係因為知道有更好食既等緊佢。