幼稚園生活（一）驚師日

每年九月敬師日，校長都會派發空白感謝咭俾小朋友，如果佢地或者家長有嘢想多謝老師，可以寫喺咭上送俾老師。有Ｄ小朋友亦會送自己畫既畫，或者零食俾老師。

今年有小朋友送左一個小錦囊俾我同我拍檔，入面有張硬硬地既紙，我地以為係小朋友畫既畫，或者摺紙之類，所以多謝完就放左喺櫃上面。直至午飯時間，我地打開小錦囊，發現入面竟然係一張伍佰蚊紙！嘩，做老師咁耐第一次敬師日收到錢，嚇到我同拍檔即刻衝入校長室。到家長接放學時，校長即刻邀請家長入校長室歸還呢一千蚊，原來係家長深圳既同鄉同佢講，敬師日記要送大禮，小朋友先會食得飽著得暖。其他班老師知道左，話我地呢D係碎料，仲俾左網上一張小學生攞住兩個GUCCI紙袋返學既相我地睇，話喺內地做幼稚園老師，唔止有錢收，仲可以免費去國外旅行。

突然諗番起，之前喺天水圍做替工，都有一位喺深圳開餐館既家長邀請全校老師上深圳按摩食飯全包宴。校長話只要唔帶走禮物同錢就唔算犯法，不知真定假呢？

幼稚園開學日（十）大仔唔瞓覺

細仔（N1）唔瞓晏覺，通常都會留番喺自己張床，無咩殺傷力。但係大仔（K3）就唔同，佢地瞓唔著，就會靜靜起革命。

幼稚園既膠床，排列時係頭對腳、腳對頭咁排，原意係小朋友雖然床貼床，但唔會面對面，以免細菌由口鼻傳播。不過就變成我個頭望住你對腳，於是瞓唔著既小朋友，就會幫兩邊瞓著左既同學仔對腳著襪除襪著鞋除鞋（無錯，極之唔衛生！）。又會拆左同學仔床單綁住床既果條繩，再將左中右三張床單綁埋一齊，直至嬸嬸收床時尖叫先會發現。

大膽Ｄ既小朋友甚至會爬落床，佢地知道班房熄左燈，老師單靠枱上的燈仔，係好難發現床單下面既人溜走左，只要佢地貼地爬，唔高過床就得。爬落床玩咩？好抱歉，除左同學仔既鞋襪，床下底係無其他野玩既。但係小朋友有得搗亂就滿足，最鍾意調亂哂各人既鞋襪，完事後靜靜爬番上床當無事發生，等待住大家瞓醒時搵唔到自己鞋襪時既尖叫。

記得最經典既一次，係當我著燈時發現，地下排列左一條整整齊齊既「鞋隊」同一條整整齊齊既「襪隊」，三十幾隻鞋同襪由班房呢邊排到另一邊，好似兩隊螞蟻兵團，震撼到連隔離班Ｄ老師都湧哂過黎參觀，大家都歎為觀止。

P.S. 三星期分段開學週完結，下星期正式踏入常規課程

幼稚園開學日（九）細仔唔瞓覺

踏入開學第三週，細仔（N1班）開始要返全日，最難過既環節就係「瞓晏覺」。為左令小朋友可以喺陌生環境下瞓覺，會暫時容許佢地攬住心愛玩具一齊瞓，但係幫助唔大。除左小部分一副天榻落黎都唔關我事既小朋友一掂張床就瞓，其餘既有D眼濕濕望住天花板細細聲叫媽咪媽咪，有D同自己玩具講「好快好快媽媽就黎接你」繼續催眠自己，仲有小部分堅持只係坐喺床邊唔肯瞓低。

最驚既一次，夠鐘叫小朋友起身時，突然有個K1女孩子大聲喊「老師，我睇唔到野，老師我睇唔到嘢，好驚呀！」嚇到我即刻抱佢落床，睇下係咪有昆蟲爬左入眼。佢繼續大聲喊仲不斷捽眼，我拉開佢對手，見唔到紅腫，睇多一陣終於明白點解佢睇唔到野。於是同佢講「請－你－掹－大－對－眼－丫」。然後，佢以慢動作掹大對眼，得左！呢位小朋友一定係發左個好奇怪既夢，奇怪到以為自己盲左。

幼稚園開學日（八）女校男生

今年學校嚟左位新老師，啱啱IVE畢業，令今年開學週更加熱鬧，因為佢係開校以來第一位男老師！

幼稚園老師一向女多男少，所以呢位男老師好似中學既女校男生一樣受歡迎。小朋友鍾意黏住大哥哥，男孩子鍾意扯佢衫尾踩佢對鞋，女孩子鍾意用崇拜既眼神望實佢；老師鍾意教小師弟，連家長都鍾意問男老師自己小朋友既情況，搞到佢拍檔（即另一位班主任）坐冷板凳。偏偏呢位男老師異常怕醜，同家長講解時會面紅，被多過一個家長圍住更加 Ai…Ai…Ai 咁疾哂，經常要拍檔救駕。

最搞笑係K3呢兩位班主任，一位係男老師，另一位係姓藍既女老師。小朋友發現左，就不斷圍住兩位班主任，笑佢地「你係藍老師？你又係男老師？有兩個藍／男老師，嘩哈哈！」咁樣編班，我懷疑校長係特登既。

幼稚園開學日（七）999誰是兇手

做老師成日都要做偵探，邊個玩完玩具唔執，邊個郁手打人先，邊個畫花張枱唔認等等。如果有目擊証人，老師多數都會接納佢既口供，因為小朋友講大話屈其他同學既機會率好低，反而當事人死口唔認既機會大，尤其大仔（K2，K3）。

今日又要做偵探，為開學佈置既自選角教具，開學唔夠一個禮拜就玩爛哂！問小朋友邊個做既，實無人認啦，最衰又無目擊証人。要搵出真兇，唯有用絶招──玩「大風吹」。

無錯，最能令小朋友講真話，就係佢地投入去玩既時候。首先叫啲無關痛癢既指令，如「大風吹，男孩子走！著裙既走！戴眼鏡既走！今朝有食早餐既走！」到大家 玩到鬆懈時，就可以入戲肉啦：「今朝入過自選角既走！」BINGO!　四個小朋友跑，只要縮窄範圍，等陣就可以逐個盤一盤佢地尋真兇。但「大風吹」唔可以 就咁就停，如果唔係個個都知原來老師玩親「大風吹」都係為左捉人，所以仲要扮若無其事玩多幾round先敢停。唉，偵探真係唔易做呀。

幼稚園開學日（六）分段開學

踏入分段開學第二週，第一週係N1仔，第二週就係K1-K3，即係話今日全校學生都返齊，可以想像今朝學校有幾熱鬧（嘈）！

有家長覺得唔公平（尤其K1插班生），大家都剩係交九月學費，點解N1班可以八月尾返多一個禮拜咁著數。其實老師都好希望放埋八月最尾果個禮拜既暑假，但無辦法，N1班第一次返學需要大量人手照顧，雖然每日只係返短短幾個鐘，但幾乎要全校總動員。頭兩日容許家長陪伴，變相照顧多一倍人，因為家長唔熟地方都會行錯路，亦會有好多問題想問老師。。

今日見番上年教既N1，即係今年升K1既小朋友，個個返黎見番同學仔都好開心。諗住過去打個招呼，點之有個小朋友問：「你係邊個？」教足佢無一年都有十個月，過左暑假連我係邊個都唔認得！我唔憤氣，於是問佢「我係咩老師呀？」，結果佢好乖咁叫我「咩老師」，激死！